القبطان المنحوس

طبعا كلنا عارفين ان اول ما تبتدي السفينه في الغرق بتكون مهمه القبطان هي محاوله انقاذ كل الركاب و اخلاء السفينه
و في الوقت ده بتفضل الفرقه الموسيقيه تعزف عشان تحاول تخفف من جو التوتر المصاحب للحاله دي
و يبتدي طاقم السفينه في انزال قوارب النجاه و عمليه الاخلاء
و بعد الاطمئنان ان كل الركاب نزلوا في قوارب النجاه يبتدي نزول باقي الطاقم ।
ولانه غالبا بيكون الوقت انتهي او بمعني ادق قمه التضحيه و الشرف ان القبطان يغرق مع سفينته
فبيفضل قاعد في مكتبه يشرب الويسكي او الفودكا و يدخن السيجار الكوبي و هو بيسمع اي لحن للاوبرا
في انتظار مصيره المحتوم.....
طبعا الي بيقرا البوست ده و استحمل انه يوصل لغايه هنا اكيد مستغرب ايه سبب الكلام الي انا كاتبه ده
بختصار شديد اني تقمصت شخصيه القبطان و فعلا عملت اخلاء للركاب من السفينه قبل ما تغرق و بعدهم
ا لطاقم او من بقي منه و ختمت بالفرقه الموسيقيه
و من ساعتها قاعد في المكتب بشرب و ادخن و انا بسمع الموسيقي بس للاسف السفينه مش عايزه تغرق
عمليه الغرق مش عايزه تخلص ولاني واثق من استحاله مجيئ فرق الانقاذ ليا لان ببساطه كل الناجيين اكيد
حيبلغوا بغرقي مع السفينه و انا اضعف من اني اعوم ضد التيار للمسافه الكبيره دي و حتي لو حاولت سمك القرش
مش حيرحمني و حتقزقز في ثواني
و اكيد مش حفوت علي نفسي فرصه الخلود علي صفحات التاريخ لما الناس تكتب عن بطولتي في اخلاء الركاب

المصيبه انها مش عايزه تغرق و شكلي حفضل عالق لامني عايش حتي لو جبان ولامني ميت حتي لو بطل